შპს თბილსერვის ჯგუფი

მტკვრის მარჯვენა სანაპიროზე, „ვეფხისა და მოყმის“ ძეგლის მიმდებარედ არსებული სატრანსპორტო კვანძის ოპტიმიზაცია განხორციელდა, რის შედეგადაც გზაჯვარედინის გამტარუნარიანობა, დაახლოებით, 15%-ით გაიზარდა.

სამუშაოების ფარგლებში, დაიხაზა ჰორიზონტალური საგზაო მონიშვნები, დამონტაჟდა ბოძკინტები და შეიცვალა შუქნიშნის მაჩვენებლები. ტერიტორიას დაემატა საავტომობილო ზოლებიც. კერძოდ, მარშალ გელოვანის გამზირიდან ჟვანიას მოედნის მიმართულებით, შუქნიშნის სიგნალით რეგულირებადი მოხვევის ზოლი, ასევე, ჟვანიას მოედნიდან მარშალ გელოვანის გამზირის მიმართულებით მესამე სამოძრაო ზოლი.

შემცირდა გზაჯვარედინის გეომეტრიული პარამეტრები და იკლო მისი გადაკვეთის დრომ, რაც შუქნიშნის ეფექტურობას ზრდის. ცვლილებების შედეგად, სატრანსპორტო საშუალებებისთვის გადაადგილება ბევრად უსაფრთხო გახდა, რადგან მანამდე, აღნიშნულ ტერიტორიაზე, მოხვევის დროს, საავარიო სიტუაციები იქმნებოდა.

სამუშაოებში თბილისის მერიის სხვადასხვა სამსახურის, მათ შორის, შპს „თბილსერვის ჯგუფის“ თანამშრომლები იყვნენ ჩართული.

გისურვებთ მშვიდობიან და უსაფრთხო მგზავრობას!